摘錄了部份今天探訪中和一位婆婆的對話……
病床上的婆婆(婆婆)
我和我的義工隊友(義工)
婆婆：多謝你哋嚟同我傾計呀!
婆婆：成日瞓响度，又唔郁得，有人嚟探就話講吓嘢，咁唔係成日都有人嚟架嘛! 多謝你哋嚟同我傾計呀!
義工：你精神都唔錯喎，有冇起身坐吓呀?
婆婆：坐唔到，好痛。瞓响張床度，咩都做唔到，又痛，你話有咩用?
婆婆：我而家冇咩要求，淨係求天主快啲俾我走，一係就唔痛，唔過份啫?!
婆婆：我又有助養細路…以前又做義工… 做人又冇行差踏錯，又冇做壞事，點解都要俾呢啲苦我受，我真係寧願聽日就咁去咗
義工：…………
義工：你有信教呀? 天主教?
婆婆：我以前信佛既。
義工：咁你有冇祈禱呀? 祈吓禱，同天主講吓吖
婆婆：我唔祈禱既，都唔實際。我淨係想唔痛，一係最好聽日就俾我就咁去咗
義工：你冇嘢留戀咩?
婆婆：我都77歲咯! 孫都大哂出哂生咯，佢哋都有自己生活，我冇嘢記掛嘞，我淨係想唔痛，一係就快啲。
義工：啲孫有冇嚟探你呀?
婆婆：都有，佢哋有佢哋既工作、生活，有時間先嚟探吓我囉! 我都冇嘢記掛，仲有咩好記掛呢? 所以我都準備好，隨時走得，個個都要行呢條路架啦!
義工：咁你都睇得好化呀
婆婆：係呀! 都化嘞! 我而家冇咩想，淨係想唔痛，一係俾我快啲走
義工：最好瞓著咗就咁去咗可?
婆婆：係呀! 咁就最好嘞!
義工：咁你祈禱求天主俾你冇痛先啦
婆婆：呢啲都唔實際既，你俾我唔痛好過
義工：啲痛令到你真係好唔舒服啊
婆婆：呢啲痛，點講你哋都唔會明，你有冇試過牙痛呀? 牙痛呀! 你知牙痛係點架啦! 我呢啲都痛到唔知點講。淨係可以瞓响度，我真係好想求個天俾快啲俾我走… 唔過份啫!
…………
對於婆婆的分享：「我又有助養細路…以前又做義工… 做人又冇行差踏錯，又冇做壞事，點解都要俾呢啲苦我受…」一時間，自己真的無言以對，因為，某個程度，我，是認同的。身邊不乏朋友，我覺得是大好人的朋友，被危疾纏繞 ，經歷一次又一次的手術；也有聽過大慈善家遭遇意外…… 這些，自己都不明白… 或者，嘗試從佛教角度去解說，是「因、果」關係嗎?!
